ശരീരം പലപ്പോഴും ചൊറിഞ്ഞ് നടക്കുന്നവരെ കുളിക്കാത്തവര്‍ എന്ന് പറഞ്ഞ് കളിയാക്കാറുണ്ട്. ചിലര്‍ കുളി കഴിഞ്ഞ് എത്തിയാലും ചൊറിച്ചിലിന് ഒരു കുറവും ഉണ്ടാകാറില്ല. എന്നാല്‍ ഇങ്ങെ എപ്പോഴും ചൊറിയുന്നത് മറ്റു ചില രോഗങ്ങളുടെ ലക്ഷണമായും പ്രകടമാകാറുണ്ട്.
ശരീരത്തിലെ ഈ അഞ്ചു ഭാഗങ്ങളില്‍ ഉണ്ടാകുന്ന ചൊറിച്ചിലിനെ പ്രത്യേകം ശ്രദ്ധിക്കണമെന്നാണ് ഡോക്ടര്‍മാര്‍ അഭിപ്രായപ്പെടുന്നത്.
കണ്ണുകള്‍ക്ക് ചുറ്റുമുള്ള ചൊറിച്ചില്‍:
കണ്ണുകള്‍ക്ക് ചുറ്റുമുള്ള ചൊറിച്ചില്‍ സാധാരണയായി അലര്‍ജി, കണ്ണിലെ അണുബാധ അല്ലെങ്കില്‍ ഡ്രൈ ഐ സിന്‍ഡ്രോം എന്നിവ മൂലമാണ് ഉണ്ടാകുന്നത്. ഇതുകൂടാതെ, എക്സിമ അല്ലെങ്കില്‍ സോറിയാസിസ് പോലുള്ള ചില ചര്‍മ്മരോഗങ്ങളും കണ്ണുകള്‍ക്ക് ചുറ്റും ചൊറിച്ചില്‍ ഉണ്ടാക്കാം. കണ്ണുകള്‍ക്ക് ചുറ്റും ചൊറിച്ചില്‍, ചുവപ്പ്, നീര്‍വീക്കം എന്നിവ ഉണ്ടായാല്‍ വൈകാതെ തന്നെ ഒരു ഡോക്ടറെ സമീപിച്ച് ആവശ്യമായ പരിശോധനകള്‍ നടത്തേണ്ടതാണ്.
കൈകളിലെ ചൊറിച്ചില്‍:
കൈകളില്‍ ചൊറിച്ചില്‍ ഉണ്ടാകാനുള്ള ഏറ്റവും സാധാരണമായ കാരണം എക്‌സിമയാണ്. കൂടാതെ, അലര്‍ജികള്‍, സോറിയാസിസ്, അല്ലെങ്കില്‍ ചിലതരം അണുബാധകള്‍ എന്നിവയും കൈകളില്‍ ചൊറിച്ചില്‍ ഉണ്ടാക്കാം. കൈകളിലെ ചൊറിച്ചിലിനൊപ്പം ചുവപ്പ്, നീര്‍വീക്കം അല്ലെങ്കില്‍ കുമിളകള്‍ എന്നിവ ഉണ്ടെങ്കില്‍ വൈകാതെ തന്നെ ഒരു ഡോക്ടറെ സമീപിക്കേണ്ടതാണ്.
സ്വകാര്യ ഭാഗങ്ങളില്‍ ചൊറിച്ചില്‍:
ബാക്ടീരിയ അല്ലെങ്കില്‍ ഫംഗസ് മൂലമുണ്ടാകുന്ന അണുബാധകള്‍ ആണ് സാധാരണയായി സ്വകാര്യ ഭാഗങ്ങളില്‍ ചൊറിച്ചില്‍ ഉണ്ടാക്കുന്നത് . അതേ സമയം, ചില സോപ്പ്, വസ്ത്രങ്ങള്‍ അല്ലെങ്കില്‍ മറ്റ് ഉല്‍പ്പന്നങ്ങള്‍ എന്നിവയില്‍ നിന്നുള്ള അലര്‍ജിയും ചൊറിച്ചില്‍ ഉണ്ടാക്കാം. സോറിയാസിസ്, എക്സിമ തുടങ്ങിയ പ്രശ്നങ്ങളും സ്വകാര്യ ഭാഗങ്ങളില്‍ ചൊറിച്ചില്‍ ഉണ്ടാക്കാം.
ചെവിയില്‍ ചൊറിച്ചില്‍ :
ചെവിക്കുള്ളില്‍ ചൊറിച്ചില്‍ ഉണ്ടാകാനുള്ള ഏറ്റവും സാധാരണ കാരണം ഇയര്‍ വാക്‌സ് അല്ലെങ്കില്‍ അണുബാധയാണ്. എന്നാല്‍ ചെവിക്കുള്ളില്‍ ചൊറിച്ചിലിനൊപ്പം വേദന, പനി അല്ലെങ്കില്‍ കേള്‍വി പ്രശ്‌നങ്ങള്‍ എന്നിവ ഉണ്ടെങ്കില്‍, ഒരു ഡോക്ടറെ സമീപിക്കേണ്ടത് പ്രധാനമാണ്.
തലയോട്ടിയിലെ ചൊറിച്ചില്‍ :
തലയോട്ടിയില്‍ ചൊറിച്ചില്‍ ഉണ്ടാകുന്നതിനുള്ള പ്രധാന കാരണം തലയിലെ താരന്‍ ആണ്. തലയോട്ടി ഡ്രൈ ആയിരിക്കുന്നതും ചൊറിച്ചിലിന് കാരണമാകാറുണ്ട്. എന്നാല്‍ തലയോട്ടിയിലെ ചൊറിച്ചിലിനൊപ്പം മുടി കൊഴിച്ചില്‍, ചുവന്ന തിണര്‍പ്പ് അല്ലെങ്കില്‍ വെളുത്ത പൊടി എന്നിവ തലയില്‍ ഉണ്ടാകുന്നുണ്ടെങ്കില്‍ ഒരു ഡോക്ടറെ കാണേണ്ടത് അത്യാവശ്യമാണ്.
