ഹിന്ദു മതത്തിന്റെ പ്രധാന ആഘോഷങ്ങളിലൊന്നായ മഹാശിവരാത്രി ഈ വർഷം 2025 ഫെബ്രുവരി 26 ന് ആഘോഷിക്കാൻ ഒരുങ്ങുകയാണ് ഭക്തർ. ഫെബ്രുവരി-മാർച്ച് അവസാനം ചന്ദ്രൻ്റെ പതിനാലാം രാത്രിയിൽ ആചരിക്കുന്ന മഹാശിവരാത്രി, പ്രപഞ്ചത്തിൻ്റെ സന്തുലിതാവസ്ഥ നിലനിർത്തുന്ന പുരുഷ-സ്ത്രീ ശക്തികളായ ശിവൻ്റെയും ശക്തിയുടെയും ഐക്യത്തെ പ്രതിനിധീകരിക്കുന്ന ആത്മീയ പ്രതിഭാസമാണ്. ജ്യോതിഷം അനുസരിച്ച്, ഈ മഹത്തായ ഉത്സവത്തിൽ നിരവധി ഗ്രഹമാറ്റങ്ങൾ സംഭവിക്കുന്നു.
ഉപവാസത്തിലൂടെയും ധ്യാനത്തിലൂടെയും അന്ധകാരത്തിനും ജീവിത പ്രതിബന്ധങ്ങൾക്കും മേലുള്ള വിജയത്തെ സൂചിപ്പിക്കുന്നതാണ് മഹാശിവരാത്രി. പരമശിവൻ്റെയും ശക്തി ദേവിയുടെയും ദിവ്യശക്തികളുടെ സംയോജനത്തെ അടയാളപ്പെടുത്തുന്നതാണ് ഈ ശുഭമുഹൂർത്തം. മഹാശിവരാത്രി ദിവസം ഉപവാസം, ശിവനെ ധ്യാനിക്കൽ, സാമൂഹിക സൗഹാർദ്ദം , ശിവക്ഷേത്രങ്ങളിൽ പ്രാർത്ഥന എന്നിവ നടക്കുന്നു. പകൽ സമയങ്ങളിൽ ആഘോഷിക്കുന്ന മിക്ക ഹൈന്ദവ ആഘോഷങ്ങളിൽ നിന്നും വ്യത്യസ്തമായി, രാത്രിയിൽ ആചരിക്കുന്ന സവിശേഷമായ ഉത്സവമാണ് ശിവരാത്രി.
മഹാശിവരാത്രിയുമായി ബന്ധപ്പെട്ട നിരവധി ഐതിഹ്യങ്ങളുണ്ട്, ലിംഗപുരാണം ഉൾപ്പെടെയുള്ള വിവിധ പുരാണങ്ങളിൽ അതിൻ്റെ പ്രാധാന്യം വിവരിച്ചിട്ടുണ്ട്. ഈ ഗ്രന്ഥങ്ങൾ മഹാ ശിവരാത്രി വ്രതം ആചരിക്കേണ്ടതിൻ്റെയും ശിവനെയും പ്രതീകാത്മക പ്രതിനിധാനമായ ലിംഗത്തെയും ആരാധിക്കുന്നതിൻ്റെയും പ്രാധാന്യം ഊന്നിപ്പറയുന്നു. ഒരു ഐതിഹ്യമനുസരിച്ച്, ഈ രാത്രിയിലാണ് ശിവൻ ‘താണ്ഡവ’ നൃത്തം അവതരിപ്പിച്ചതെന്നും പറയപ്പെടുന്നു.
ശിവൻ്റെയും പാർവതി ദേവിയുടെയും വിവാഹവുമായി ബന്ധപ്പെട്ടതാണ് മറ്റൊരു ഐതിഹ്യം. ഈ വിശ്വാസം വിവാഹിതരായ ദമ്പതികൾക്കും നല്ല ഭർത്താവിനെ അന്വേഷിക്കുന്ന അവിവാഹിതരായ സ്ത്രീകൾക്കും വിശേഷാൽ പ്രാധാന്യമുള്ളതാകുന്നു.
എങ്ങനെയാണ് മഹാ ശിവരാത്രി പൂജാ ചടങ്ങുകൾ ചെയ്യുക?
സൂര്യോദയത്തിനുമുമ്പ് കുളിച്ച് പുതിയ വസ്ത്രങ്ങൾ ധരിച്ച് ശിവക്ഷേത്ര
ദർശനം നടത്തണം. കൂടാതെ സ്ത്രീകൾ അവരുടെ ഭർത്താവിനും മകനും വേണ്ടി ശിവലിംഗത്തിൽ പാലഭിഷേകം നടത്തുന്നതാണ്. മഹാശിവരാത്രി പൂജയിൽ വെള്ളം, പാൽ, ഇലകൾ, പഴങ്ങൾ എന്നിവയും ശിവലിംഗത്തെ പൂജിക്കുന്നതിനായി ഉപയോഗിക്കുന്നു. ഒപ്പം ശിവലിംഗത്തിന് ചുറ്റും മൂന്നോ ഏഴോ പ്രദക്ഷിണം നടത്തുന്നു. മഹാശിവരാത്രിയുടെ രാത്രിയിൽ ക്ഷേത്രങ്ങളിൽ ‘ഓം നമഃ ശിവായ്’ എന്ന മന്ത്രത്തിൽ പ്രാർത്ഥനകൾ നടത്താറുണ്ട്.
