സംസ്ഥാന സ്‌കൂള്‍ കലോത്സവം ഇന്ന് അവസാനിക്കും: സ്വര്‍ണ്ണക്കപ്പില്‍ മുത്തമിടാന്‍ ഇഞ്ചോടിഞ്ച് പോരാട്ടം, തൃശൂര്‍ മുന്നില്‍ തൊട്ടു പിന്നാലെ കണ്ണൂര്‍

തിരുവനന്തപുരം: സംസ്ഥാന സ്‌കൂള്‍ കലോല്‍സവത്തിന് ഇന്ന് കൊടിയിറങ്ങുമ്പോള്‍ സ്വര്‍ണ്ണക്കപ്പില്‍ മുത്തിടാന്‍ പൊരിഞ്ഞ പോരാട്ടമാണ് നടക്കുന്നത്.

ഇഞ്ചോടിഞ്ച് പോരാട്ടമായിരുന്നു കഴിഞ്ഞ കുറച്ച് ദിവസങ്ങളായി നടന്നു കൊണ്ടിരിക്കുന്നത്. ഇപ്പോഴത്തെ പോയന്റ് നില 950 പോയിന്റ് നേടി തൃശൂര്‍ ആണ് മുന്നില്‍ നില്‍ക്കുമ്പോള്‍ 948 പോയിന്റുമായി കണ്ണൂര്‍ തൊട്ടു പിന്നിലുണ്ട്. ആദ്യ ദിവസങ്ങളില്‍ കണ്ണൂര്‍ ആയിരുന്നു മുന്നില്‍ നിന്നത്.

946 പോയിന്റ് നേടി പാലക്കാട് ആണ് മൂന്നാം സ്ഥാനത്ത് നില്‍ക്കുന്നത്. കോഴിക്കോട് 944 പോയിന്റുമായി നാലാമതാണ്. മലപ്പുറത്തിന് 921 പോയിന്റും എറണാകുളത്തിന് 915 പോയിന്റുമാണുള്ളത്.

കൊല്ലം (906), തിരുവനന്തപുരം (900), ആലപ്പുഴ (894), കോട്ടയം (868), കാസര്‍ഗോഡ് (861), വയനാട് (857), പത്തനംതിട്ട (792), ഇടുക്കി (772) എന്നീ ജില്ലകളാണ് തുടര്‍ന്നുള്ള സ്ഥാനങ്ങളില്‍.

ഹൈസ്‌കൂള്‍ വിഭാഗത്തില്‍ 447 പോയിന്റുമായി തൃശൂരാണ് മുന്നില്‍. ഹയര്‍സെക്കന്‍ഡറി വിഭാഗത്തില്‍ 504 പോയിന്റുമായി പാലക്കാടാണ് മുന്നില്‍. ഹൈസ്‌കൂള്‍ വിഭാഗത്തില്‍ 445 പോയിന്റമായി കണ്ണൂരും കോഴിക്കോടുമാണ് രണ്ടാമത്. ഹയര്‍സെക്കന്‍ഡറി വിഭാഗത്തില്‍ 503 പോയിന്റ് വീതം തൃശൂരും കണ്ണൂരുമാണ് രണ്ടാം സ്ഥാനത്ത്.

ഹൈസ്‌കൂള്‍ വിഭാഗം അറബിക് കലോത്സവത്തില്‍ കണ്ണൂര്‍, കോഴിക്കോട്, എറണാകുളം ജില്ലകള്‍ 90 പോയിന്റ് വീതം നേടി മുന്നിലാണ്. ഹൈസ്‌കൂള്‍ വിഭാഗം സംസ്‌കൃതം കലോത്സവത്തില്‍ 95 പോയിന്റ് വീതം നേടിയ മലപ്പുറം, പാലക്കാട്, കാസര്‍ഗോഡ് ജില്ലകളാണ് മുന്നില്‍.