രക്തക്കറ മുതല്‍ എന്ത് കറയും ഇനി വസ്ത്രങ്ങളില്‍ നിന്നും പോകില്ലെന്ന പേടി വേണ്ട, വസ്ത്രങ്ങളിലെ കറ നീക്കാന്‍ ഏറ്റവും മികച്ച മാര്‍ഗ്ഗങ്ങള്‍

ഏറെ ഇഷ്ടപ്പെട്ട വസ്ത്രമായിരിക്കും ചിലപ്പോള്‍ നിസ്സാരമായ കറ പറ്റി ഉപേക്ഷിക്കേണ്ടി വരുന്നത്. പലരുടെയും പ്രിയപ്പെട്ടതും മികച്ച ഓര്‍മ്മ സമ്മാനിക്കുന്നതുമായ എത്ര വസ്ത്രങ്ങള്‍ ഇത്തരത്തില്‍ ഉപേക്ഷിക്കേണ്ടി വന്നിട്ടുണ്ടാകും? ഇനി ആ ഒരു ടെന്‍ഷന്‍ വേണ്ട.

ചായക്കറയോ, ഭക്ഷണത്തിന്റെ കറയോ, രക്തക്കറയോ അങ്ങനെ എന്തായാലും അത് വളരെ പെട്ടെന്ന് മാറ്റിയെടുക്കാന്‍ ഇതാ കുറച്ച് അടിപൊളി ടിപ്‌സ്. വസ്ത്രങ്ങളിലെ കറ നീക്കാന്‍ ഏറ്റവും ഫലവത്തായ ഒന്നാണ് വിനാഗിരി. ഈ വിനാഗിരി ഉപയോഗിച്ച് കറകള്‍ എങ്ങിനെ നീക്കം ചെയ്യാമെന്ന് നോക്കാം.

രക്തക്കറ നീക്കാന്‍

രക്തക്കറകള്‍ വസ്ത്രങ്ങളില്‍ നിന്നും പെട്ടെന്ന് പോവുകയില്ല. ഇത്തരം കറകള്‍ പോകുവാന്‍ നമുക്ക് വീട്ടില്‍ തന്നെ ഉപയോഗിക്കാവുന്ന ഒന്നാണ് വിനാഗിരി. വസ്ത്രങ്ങളില്‍ രക്തക്കറ ആയിരിക്കുന്ന ഭാഗത്ത് നന്നായി വിനാഗിരി ഒഴിച്ച് ഒരു പതിനഞ്ച് മിനിറ്റ് കുതിര്‍ത്ത് വയ്ക്കുക. അതിനുശേഷം നന്നായി ഉരച്ച് കഴുകി എടുക്കാവുന്നതാണ്. ഇത്തരത്തില്‍ ചെയ്യുന്നത് വസ്ത്രങ്ങളിലെ രക്തക്കറ വേഗത്തില്‍ നീക്കം ചെയ്യുവാന്‍ സഹായിക്കുന്നതായിരിക്കും.

ഇരുമ്പ് കറ നീക്കം ചെയ്യാം

തുരുമ്പ് പിടിച്ച ആണിയിലോ അല്ലെങ്കില്‍ കമ്പിയിലോ കിടന്ന വസ്ത്രങ്ങളില്‍ ഇരുമ്പിന്റെ കറ പിടിക്കുന്നത് കാണാം. ഇത്തരം കറകള്‍ വളരെ വേഗത്തില്‍ മാറ്റിയെടുക്കുവാന്‍ സാധ്യമല്ല. എത്ര കഴുകിയാലും ചില കറകള്‍ അതില്‍ തന്നെ ഇരിക്കുന്നത് കാണാം. ഈ കറകള്‍ നീക്കം ചെയ്യുവാനായി വിനാഗിരി ഉപയോഗിക്കാവുന്നതാണ്. ഇരുമ്ബ് കറകള്‍ നീക്കം ചെയ്യുവാന്‍ ഒരു പഞ്ഞി എടുത്ത് അതിലേയ്ക്ക് വിനാഗിരി ഒഴിക്കുക. അതിനു ശേഷം ആ പഞ്ഞി ഉപയോഗിച്ച് കറയായിരിക്കുന്ന ഭാഗത്ത് നന്നായി തുടയ്ക്കുക. ഇത്തരത്തില്‍ കറ പോകുന്നതുവരെ ചെയ്യാവുന്നതാണ്.

ഛര്‍ദ്ദി ആയതിന്റെ കറ

കുട്ടികളേയും കൊണ്ട് പുറത്തേയ്ക്ക് ഇറങ്ങിയാല്‍, പ്രത്യേകിച്ച് ചെറിയ കുട്ടികളാണെങ്കില്‍ ചിലപ്പോള്‍ ഛര്‍ദ്ദിയ്ക്കും. ഇത്തരത്തില്‍ ഛര്‍ദ്ദി ആകുന്നത് ഒരു കറ തന്നെയാണ്. പ്രത്യേകിച്ച് നല്ല വസ്ത്രങ്ങളാണ് ധരിച്ചിരിക്കുന്നതെങ്കില്‍ ആ വസ്ത്രങ്ങള്‍ പിന്നീട് ഉപയോഗിക്കുവാന് സാധിക്കാത്ത അവസ്ഥയില്‍ പോലും എത്തിയെന്നിരിക്കാം. ഇത് നീക്കം ചെയ്യുവാനും വിനാഗിരി ഉപയോഗിക്കുന്നത് നല്ലതാണ്. ഛര്‍ദ്ദി ആയതിന്റെ കറ നീക്കുവാന്‍ വിനാഗിരിയില്‍ വെള്ളം ചേര്‍ക്കേണ്ട ആവശ്യം ഒട്ടും തന്നെ ഇല്ല. വിനാഗിരി എടുത്ത് കറയായ ഭാഗം അതില്‍ നന്നായി കുതിര്‍ത്ത് വയ്ക്കുക. ഒരു 30 മിനിറ്റിന് ശേഷം ഇത് നന്നായി കഴുകി എടുത്താല്‍ കറപോയിരിക്കുന്നതായി കാണാം.

വസ്ത്രങ്ങളിലെ കോളറിലെ കറ

വസ്ത്രങ്ങളിലെ കോളറിലും, കൈമടക്കുകളിലും വിയര്‍പ്പിരുന്നു അഴുക്ക് പറ്റിയും കറകള്‍ രൂപപ്പെടാറുണ്ട്. കൃത്യമായ രീതിയില്‍ നീക്കം ചെയ്യപ്പെട്ടില്ലെങ്കില്‍ ഇത് നല്ല കട്ടിയില്‍ രൂപപ്പെടുകയും ചെയ്യും. ഇത്തരം കറകള്‍ വേഗത്തില്‍ നീക്കം ചെയ്യുവാന്‍ ഏറ്റവും നല്ല മാര്‍ഗ്ഗങ്ങളില്‍ ഒന്നാണ് വിനാഗിരി. ഈ കറകള്‍ നീക്കം ചെയ്യുവാനായി വിനാഗിരി എടുത്ത് ഒരു സ്‌പ്രേ ബോട്ടിലില്‍ ആക്കിയെടുക്കുക. അതിനുശേഷം ഇത് കറ ഉള്ള ഭാഗങ്ങളിലായി നന്നായി സ്‌പ്രേ ചെയ്ത് കൊടുക്കാവുന്നതാണ്. ഇത്തരത്തില്‍ സ്‌പ്രേ ചെയ്ത് ഒരു പത്ത് പതിനഞ്ച് മിനിറ്റ് വെച്ചതിന് ശേഷം നന്നായി ഉരച്ച് കഴുകി എടുക്കാവുന്നതാണ്. ഇത് കറകള്‍ വേഗത്തില്‍ നീക്കം ചെയ്യുവാന്‍ സഹായിക്കും.

ചായക്കറ കളയാന്‍

വസ്ത്രങ്ങളില്‍ ചായക്കറ പിടിച്ചാല്‍ അത് വളരെ പെട്ടെന്ന് പോവുകയില്ല. ചായ വീണ് പെട്ടെന്ന് തുടക്കുന്നതും അതുപോലെതന്നെ തുടക്കാതിരുന്നാല്‍ പോലും വസ്ത്രങ്ങളില്‍ അതിന്റെ കറ പിടിച്ചിരിക്കുന്നത് കാണാം. പ്രത്യേകിച്ച് വെള്ള മുണ്ടില്‍, അതുപോലെ, ഇളം നിറമുള്ള വസ്ത്രങ്ങളിലെല്ലാം തന്നെ ഈ ചായക്കറ എടുത്ത് കാണിക്കുകയും ചെയ്യും. ഈ കറ മാറ്റാന്‍, പ്രധാനമായും വെള്ളവും വിനാഗിരിയും മാത്രമാണ് അത്യാവശ്യമായി വരുന്നത്. ഇതിലേയ്ക്ക് 1/3 വിനാഗിരിയും അതുപോലെ, 2/3 വെള്ളവും എടുത്ത് നന്നായി മിക്‌സ് ചെയ്ത് വയ്ക്കണം. ഇത് കറയുള്ള ഭാഗത്ത് പുരട്ടി ഒരു 30 മിനിറ്റിന് ശേഷം കഴുകി കളയാവുന്നതാണ്. ഇത്തരത്തില്‍ കാപ്പിക്കറയും നീക്കം ചെയ്യാവുന്നതാണ്.