മുട്ട ഇഷ്ടപ്പെടാത്തവര്‍ ഉണ്ടാകില്ല. ചില വെജിറ്റേറിയന്‍സ് പോലും മുട്ട കഴിക്കുന്ന കാര്യത്തില്‍ അതൃപ്തി കാണിക്കാറില്ല. നിരവധി ആരോഗ്യ ഗുണങ്ങള്‍ മുട്ടയില്‍ അടങ്ങിയിട്ടുണ്ട് എന്ന കാര്യത്തില്‍ ഒരു സംശയവും വേണ്ട.
മുട്ടയുടെ ഗുണങ്ങള്‍ കൊണ്ട് തന്നെ പലരും ഡയറ്റില്‍ മുട്ട ഉള്‍പ്പെടുത്താറുമുണ്ട്. പലപ്പോഴും എല്ലാവരെയും ആശയക്കുഴപ്പത്തില്‍ ആക്കുന്ന ഒരു സംശയമാണ് പുഴുങ്ങിയ മുട്ടയാണോ ഓംലേറ്റാണോ കൂടുതല്‍ ആരോഗ്യത്തിന് ഗുണകരം എന്ന്. ഇപ്പോഴിതാ അതിന് ഒരു ഉത്തരം ആയിരിക്കുകയാണ്.
പുഴുങ്ങിയ മുട്ട
കാണാന്‍ സിംപിള്‍ ആണെങ്കിലും പോഷകങ്ങളുടെ കാര്യത്തില്‍ പവര്‍ഫുള്‍ ആണ് മുട്ട പുഴുങ്ങി കഴിക്കുന്നത്. ഇടത്തരം വലിപ്പമുള്ള ഒരു പുഴുങ്ങിയ മുട്ടയില്‍ ഏകദേശം 78 കലോറി ഉണ്ടാകും. ഇവ കൊഴുപ്പുകളുടെയും പ്രോട്ടീനുകളുടെയും അവശ്യ വിറ്റാമിനുകളുടെയും ധാതുക്കളുടെയും ഒരു ബാലന്‍സ് നല്‍കുന്നു.
എല്ലുകളുടെ ആരോഗ്യത്തിനും ഊര്‍ജ ഉല്‍പാദനത്തിനും സഹായിക്കുന്ന റൈബോഫ്‌ലേവിന്‍, വിറ്റാമിന്‍ ഡി, വിറ്റാമിന്‍ ബി 12 എന്നിവയും മുട്ടയില്‍ അടങ്ങിയിട്ടുണ്ട്. കൂടാതെ തലച്ചോറിന്റെ പ്രവര്‍ത്തനത്തിന് പ്രധാനമായ കോളിന്റെ മികച്ച ഉറവിടമാണ് പുഴുങ്ങിയ മുട്ട. കണ്ണിന്റെ ആരോഗ്യത്തിന് ആവശ്യമായ ആന്റിഓക്സിഡന്റുകളായ ല്യൂട്ടിന്‍, സിയാക്‌സാന്തിന്‍ എന്നിവ മുട്ടയുടെ മഞ്ഞക്കരുവില്‍ അടങ്ങിയിട്ടുണ്ട്. ഈ ആന്റിഓക്സിഡന്റുകള്‍ പ്രായവുമായി ബന്ധപ്പെട്ട മാക്യുലര്‍ ഡീജനറേഷനില്‍ നിന്ന് സംരക്ഷിക്കുന്നു.
ഓംലേറ്റ്
ഓംലേറ്റില്‍ ഉപയോഗിക്കുന്ന ചേരുവകള്‍ അനുസരിച്ച് രുചിയിലും പോഷകഗുണത്തിലും വ്യത്യാസമുണ്ടാകാം. ഉയര്‍ന്ന അളവില്‍ പ്രോട്ടീന്‍ അടങ്ങിയിട്ടുണ്ടെങ്കിലും എണ്ണ പോലുള്ളത് ഉപയോഗിക്കുന്നതിനാല്‍ കലോറിയും അനാരോഗ്യകരമായ കൊഴുപ്പും വര്‍ധിപ്പിക്കും.
ഏതാണ് ആരോഗ്യകരം?
ഈ രണ്ട് രീതിയിലും മുട്ട പാകം ചെയ്യുന്നത് ആരോഗ്യഗുണങ്ങള്‍ നല്‍കുന്നതാണ്. ഓംലേറ്റ് രുചി കൂട്ടുമ്പോള്‍ പുഴുങ്ങിയ മുട്ട കലോറി കുറയ്ക്കാന്‍ സഹായിക്കും. ഓംലെറ്റില്‍ നാരുകള്‍, ഇരുമ്പ്, വിറ്റാമിന്‍ സി, ആരോഗ്യകരമായ കൊഴുപ്പുകള്‍ എന്നിവ അടങ്ങിയിട്ടുണ്ട്. പുഴുങ്ങിയ മുട്ട പ്രോട്ടീന്‍, വിറ്റാമിന്‍ ഡി, കോളിന്‍ എന്നിവയുടെ മികച്ച ഉറവിടമാണ്.
പ്രോട്ടീന്‍ ഉപഭോഗം കൂട്ടാന്‍ ആഗ്രഹിക്കുന്നവര്‍ക്ക് പുഴുങ്ങിയ മുട്ട കഴിക്കുന്നത് മികച്ച ഓപ്ഷനാണ്. സമീകൃത പ്രഭാതഭക്ഷണം ആഗ്രഹിക്കുന്നവര്‍ക്ക് ഓംലെറ്റുകള്‍ ഒരു മികച്ച ഓപ്ഷനാണ്. ഓംലേറ്റ് ഉണ്ടാക്കുമ്പോള്‍ ചേരുവരകളുടെ കാര്യത്തില്‍ ശ്രദ്ധിക്കണം.
